Իրանը կարող է դադարեցնել միջուկային գործունեությունը միայն ԱՄՆ պատժամիջոցների վերացման դեպքում

Իրանը չի դադարեցնի կամ կասեցնի միջուկային գործունեությունը, քանի դեռ ԱՄՆ-ը չեղյալ չի հայտարարել բոլոր պատժամիջոցները և չի վերադարձել 2015-ի միջուկային համաձայնագրին: Այս մասին հայտարարել է Իրանի արտաքին գործերի փոխնախարար Աբաս Արաղչին. հաղորդում է IRNA գործակալությունը:

Նրա խոսքով՝ Թեհրանը չի պատրաստվում դանդաղեցնել միջուկային գործունեության տեմպերը, հատկապես` ուրանի հարստացման տեսանկյունից: Ավելին` ուրանի` մինչև 20% հարստացումը կընթանա ավելի արագ:

«Այս միտումը կշարունակվի այնքան ժամանակ, քանի դեռ չի կնքվել համաձայնագիր, որն ԱՄՆ-ին պարտավորեցնում է չեղարկել բոլոր պատժամիջոցները, և, ի դեպ, բոլորըը պետք է անհապաղ վերացվեն»,- շեշտել է Արաղչին:

Նա նշել է, որ կան նշաններ, որ ամերիկյան կողմը վերանայում է իր դիրքորոշումը, բայց Իրանը չի կարող լիարժեք գնահատել իրավիճակը մինչ բանակցությունների ավարտը: Այս գործընթացն առաջ է ընթանում, բանակցություններն ընթանում են կառուցողական մթնոլորտում: