ԱՄՆ պետդեպարտամենտը մտահոգություն է հայտնել Եգիպտոսի կողմից Սու-35 կործանիչների գնման կապակցությամբ

ԱՄՆ պետքարտուղար Էնթոնի Բլինքենը մտահոգություն է հայտնել Եգիպտոսի կողմից ռուսական Սու-35 կործանիչներ գնելու կապակցությամբ: Համապատասխան հաղորդագրությունը տեղադրվել է ԱՄՆ պետդեպարտամենտի կայքում:

Փետրվարի 23-ին Բլինքենը հեռախոսազրույց է ունեցել իր եգիպտացի գործընկեր Սամեհ Շուքրիի հետ: Զրույցի ընթացքում դիվանագետները քննարկել են նաև ահաբեկչության դեմ պայքարում գործընկերության կարևորությունը և տարածաշրջանում վերջին զարգացումները:

ԱՄՆ արտաքին քաղաքական գերատեսչության ղեկավարը շեշտել է, որ Եգիպտոսում մարդու իրավունքների իրավիճակը «կենտրոնական տեղ կզբաղեցնի» երկու երկրների հարաբերություններում: Զրույցի այլ մանրամասներ չեն հաղորդվում:

«Պետքարտուղարը մտահոգություն է հայտնել մարդու իրավունքների վերաբերյալ, ինչը, նրա խոսքով, առանցքային կլինի ԱՄՆ-ի և Եգիպտոսի միջև երկկողմ հարաբերությունների և Ռուսաստանից Եգիպտոսի կողմից Սու-35 կործանիչների հնարավոր գնման համար»,– նշվում է հաղորդագրության մեջ։