Ադրբեջանը սկսել է իրեն դավադրաբար հանձնված Շուշիի բերդապարիսպների վերականգնման աշխատանքները

Ադրբեջանը սկսել է Արցախի բերդաքաղաք Շուշիի պատմական բերդապարիսպների վերականգնման աշխատանքները։ Պարիսպը վնասվել էր վերջին պատերազմի ժամանակ՝ Շուշին դավադրաբար թշնամուն հանձնելուց առաջ։

Բերդի պարիսպների վերակառուցումն իրականացվում է Ադրբեջանի Ճարտարապետության և քաղաքաշինության պետական կոմիտեի կողմից, ներգրավված է 22 մասնագետ:

«Նախնական աշխատանքները նախատեսվում է ավարտել հաջորդ ամսվա վերջին: Հաջորդ փուլում կսկսվեն ավելի լայնածավալ վերակառուցողական աշխատանքները»,– հաղորդում է Trend-ը:

Հիշեցնենք, որ այսօր Ադրբեջանը, ռուս խաղաղապահների ուղեկցությամբ, Արցախի ներկայիս տարածքով Շուշի է ուղարկել 60-ից ավելի բեռնատար՝ քաղաքում շինարարական աշխատանքների համար։