Պետդեպարտամենտը պատժամիջոցներ է սահմանել Ասադի կնոջ և նրա հարազատների նկատմամբ

ԱՄՆ պետքարտուղարությունը պատժամիջոցներ է սահմանել Սիրիայի նախագահօ կնոջ՝ Ասմա Ասադի և նրա մերձավոր մի քանի հարազատների նկատմամբ: Այս մասին ասվում է պետքարտուղար Մայք Պոմպեոյի՝ երեքշաբթի  հրապարակած գրավոր հայտարարության մեջ:

«Պետդեպարտամենտն այսօր պատժամիջոցներ է սահմանել Ասմա Ասադի՝ Բաշար Ասադի կնոջ դեմ, սիրիական հակամարտության քաղաքական կարգավորման գործընթացում ջանքերին խոչընդոտելու համար: Ասման, վարչախմբի շահերից ելնելով, գլխավորում էր տնտեսական և քաղաքական իշխանությունը համախմբելու ջանքերը, այդ թվում՝ իր, այսպես կոչված, բարեգործական և սոցիալական կազմակերպությունների միջոցով: Բացի այդ՝ մենք պատժամիջոցներ ենք սահմանում Ասմա Ասադի ամենամոտ հարազատների հանդեպ»,- ասել է ամերիկյան դիվանագիտության ղեկավարը:

Ըստ նրա՝ սահմանափակումներ են մտցվել նաև Սիրիայի ռազմական հետախուզության ղեկավար գեներալ Քեֆահ Մուլհամի նկատմամբ: Նա նաև հիշեցրել է, որ «հինգ տարի առաջ ՄԱԿ-ի Անվտանգության խորհուրդը միաձայն ընդունել է 2254 բանաձևը, որը հստակորեն նախանշում էր սիրիական հակամարտության կայուն կարգավորման միակ ճանապարհը»:

Պետդեպարտամենտի սև ցուցակում գտնվողներին արգելվում է մուտք գործել ԱՄՆ: