Հունաստանի ԱԳՆ ղեկավարը Թուրքիային անվանել է «ջիհադիստների տուրիստական գործակալ»

Հունաստանի արտաքին գործերի նախարար Նիկոս Դենդիասը հայտարարել է, որ Թուրքիան տարածաշրջանում «հանդարտությունը խախտող է» ու «ջիհադիստների տուրիստական գործակալ», և դրան պետք է դիմադրել. հայտնում է «ՌԻԱ Նովոստին»։

Թուրքիայի քաղաքականությունն Ամմանում կայացած՝ Հունաստանի, Կիպրոսի և Հորդանանի արտաքին գործերի նախարարների եռակողմ հանդիպման քննարկման թեմաներից մեկն էր:

«Թուրքիան գործում է միջազգային իրավունքի շրջանակներից դուրս և, ցավոք, տարածաշրջանում հանդարտությունը խախտող է դարձել՝ սպառնալով ուժ կիրառել: Նա սպառնացել է Հունաստանին պատերազմով, եթե Հունաստանը գործի իր ինքնիշխան իրավունքին համապատասխան և տարածքային ջրերը հասցնի 12 ծովային մղոնի: Միգրանտներին օգտագործում է որպես գործիք, քարոզչական և կեղծ լուրեր է տարածում, անվտանգության խնդիրն է սրում, ջիհադիստներին Լիբիայից Կովկաս է տեղափոխում, այն, ինչը ես անվանում եմ «ջիհադիստական տուրիստական գործակալություն», և սպառնալիք  է ստեղծում տարածաշրջանում խաղաղության ու կայունության համար»,-  հայտարարել է Դենդիասը։