Իրանի խորհրդարանը հավանություն է տվել միջուկային գործունեության աշխուժացման նախագծին

Իրանի խորհրդարանը հաստատել է միջուկային գործունեության ակտիվացման վերաբերյալ նախագծի ընդհանուր դրույթները. հայտնում է Fars գործակալությունը:

Որոշվել է միջուկային ֆիզիկոս Մոհսեն Ֆախրիզադեի սպանությունից հետո արագ դիտարկել «Պատժամիջոցները հանելու ռազմավարական միջոց» վերնագրով փաստաթուղթը: Խորհրդարանական նիստում օրինագծին հավանություն է տվել 291 պատգամավորներից 251-ը:

Փաստաթուղթը նախատեսում է տարեկան 120 կիլոգրամ ուրանի արտադրություն և 20 տոկոս հարստացման մակարդակով (20 տոկոսից ավելի ուրանը համարվում է զենք), ինչպես նաև ամսական առնվազն 500 կիլոգրամ ցածր հարստացված ուրանի արտադրություն: Իրանն այժմ ուրանը հարստացնում է չորս տոկոսից շատ, այն դեպքում երբ, ըստ գործարքի, նախատեսված է 3.67 տոկոս:

Կառավարությունը օրինագծի հաստատումից հետո՝ երկու ամսվա ընթացքում, պետք է դադարեցնի միջուկային օբյեկտներ մուտքի տրամադրումը, ինչը գերազանցում է ԱԷՄԳ-ի հետ լրացուցիչ երաշխիքային արձանագրությունը: Իսկ եթե Թեհրանը չկարողանա կարգավորել բանկային կապերը Եվրոպայի հետ և այնտեղ նավթի արտահանումը, ապա կառավարությունը պետք է դադարեցնի ընդլայնված ստուգումների մասին արձանագրության իրականացումը:

Փաստաթղթի վավերացման համար անհրաժեշտ է նաև Սահմանադրության պահապանների խորհրդի`հատուկ գերխորհրդարանական մարմնի համաձայնությունը, որը ստուգում է օրինագծերը: Այդ դեպքում օրենքը պարտադիր ուժ կունենա: