Էրդողանը Հայաստանին «ավազակապետություն» է անվանել և անթույլատրելի համարել Արցախում զինադադարի հասնելու` Մինսկի խմբի կոչերը

Թուրքիայի նախագահ Ռեջեփ Թայիփ Էրդողանն անընդունելի է համարում ԵԱՀԿ Մինսկի խմբի ջանքերը Լեռնային Ղարաբաղում հրադադարի ռեժիմի հասնելու համար:

«Անընդունելի է, որ այժմ Մինսկի խումբը պահանջում է հրադադար հաստատել Լեռնային արաբաղում: Նրանք պետք է պահանջեն, որ Հայաստանը նախ դուրս գա Լեռնային Ղարաբաղի գրավյալ տարածքներից»,- հինգշաբթի հայտարարել է թուրքական հանրապետության նախագահը՝ ելույթ ունենալով խորհրդարանում:

Էրդողանը նշել է, որ Թուրքիան կշարունակի աջակցել Ադրբեջանին «Երկու պետություն, մեկ ազգ» սկզբունքի հիման վրա:

Բացի դրանից` Կիպրոսի 30 տոկոսից ավելին, Սիրիայի հյուսիսային շրջանները բռնազավթած, Իրաքի հյուսիս ներխուժած և տեղի բնակչությանը մեծ արհավիրքներ պատճառած Թուրքիայի ղեկավարը դիմել է Հայաստանին՝ պահանջելով «հրաժարվել Թուրքիայի վերաբերյալ ստի և ապատեղեկատվության հոսքից, քանի որ դա նրանց (Հայաստանին) չի փրկի», իսկ «Հայաստանի նման ավազակապետությանն» աջակցող պետություններին զգուշացրել է, որ «պատասխան են տալու մարդկության խղճի առջև»: