«Վրացական երազանքը» վարչապետի պաշտոնում կառաջադրի Գիորգի Գախարիային

«Վրացական երազանք» կուսակցությունը ներկայացրել է հոկտեմբերի 31-ին կայանալիք խորհրդարանական ընտրությունների ընտրական ցուցակի առաջին քսանյակին, որի առաջին հորիզոնականում գործող վարչապետ Գիորգի Գախարիան է։

Մասնավորապես՝ կուսակցությունը խորհրդարանական ընտրություններում հաղթելու դեպքում, որպես վարչապետի թեկնածու, կառաջադրի Գախարիային, իսկ 10-րդ գումարման խորհրդարանի նախագահի թեկնածուն կլինի Արչիլ Թալակվաձեն (գործող նախագահը):

Հիշեցնենք՝ ավելի վաղ քաղաքական ուժն Ախալքալաքում և Նինոծմինդայում որպես մեծամասնական պատգամավորի թեկնածու առաջադրել էր գործող պատգամավոր, «Վրացական երազանք» կուսակցության ցուցակով ընտրված Սամվել Մանուկյանին:

Վրաստանում 2020 թվականի խորհրդարանական ընտրությունները տեղի կունենան հոկտեմբերի 31-ին: Վերջերս ընդունված սահմանադրական փոփոխությունների արդյունքում Վրաստանի նոր խորհրդարանը կձևավորվի 120 համամասնական, 30 մեծամասնական կարգով ընտրված պատգամավորներից: