Վիճաբանություն՝ դիմակ չկրելու պատճառով. քաղաքացին հարվածել ու քաշքշել է ոստիկաններին, պատճառել մարմնական վնասվածք

2020թ.  օգոստոսի 31-ին  ՀՀ ոստիկանության Վաղարշապատի բաժնի ՊՊԾ դասակի հրամանատարը զեկուցագիր է ներկայացրել այն մասին, որ նույն օրը՝ ժամը 16:15-ի սահմաններում,  Էջմիածնի քաղաքապետարանի դիմացի այգում դիմակ չկրելու հարցի շուրջ քաղաքացին ոստիկանների հետ խոսել է վիրավորական եւ արհամարհական տոնով, դրսեւորել ագրեսիվ վարքագիծ, հրաժարվել ներկայացնել անձը հաստատող փաստաթուղթ, որից հետո ձեռքով մեկ անգամ հարվածել է իրեն՝ պատճառելով ֆիզիկական ցավ:

Քննչական կոմիտեից Yerkir.am-ին հայտնում են, որ այդ ընթացքում նշված քաղաքացին մեկ այլ ոստիկանի նկատմամբ եւս բռնություն է գործադրել՝ քաշքշելով նրան, որի հետեւանքով վերջինս ստացել է մարմնական վնասվածք:

Դեպքի առթիվ ՀՀ ոստիկանության Վաղարշապատի բաժնում հարուցվել է քրեական գործ՝ ՀՀ քրեական օրենսգրքի 316-րդ հոդվածի (իշխանության ներկայացուցչի նկատմամբ բռնություն գործադրելը)  1-ին մասով: 3 ոստիկան տուժող է ճանաչվել:

38-ամյա քաղաքացին ձերբակալվել է՝ ոստիկանների նկատմամբ բռնություն գործադրելու կասկածանքով:

Նախաքննությունը շարունակվում է: