Հունաստանը օգոստոսի 1-ին վեց նավահանգիստ կբացի ճամփորդանավերի համար

Օգոստոսի 1-ից ճամփորդանավերը հնարավորություն կունենան մտնել Հունաստանի վեց նավահանգիստ. այս մասին  պաշտոնական ծանուցումը, Հունաստանի GNTO տուրիստական կազմակերպության տեղեկացմամբ, զբոսաշրջության նախարար Հարիս Տեոխարիսն ուղարկել է Ծովային ճամփորդությունների միջազգային ուղեգծերի ասոցիացիային և  այդ սեկտորի երեք խոշորագույն ընկերությունների (MSC Cruises, Costa, TUI Cruises), որոնք գործում են Հունաստանում: 

Այս առնչությամբ կազմակերպությունում նշել են.  «Զբոսաշրջության նախարարը պաշտոնապես հայտարարել է, որ 2020 թվականի օգոստոսի 1-ից ճամփորդանավերին թույլատրվել է Հունաստան մտնելիս ժամանել վեց նավահանգիստ: Առաջին կառանումից հետո ճամփորդանավերը կկարողանան մտնել ցանկացած այլ հունական նավահանգիստ: Տեոխարիսը հստակեցրել է, որ այդ ռեժիմը կփոխվի միայն նոր համաճարակաբանական պայմանների դեպքում»։ 

Ի հավելումն՝ նախարարն ասել է. «Հունաստանը առաջին երկիրն է, որն արձագանքել է ծովային ճամփորդությունների ինդուստրիայի խնդիրներին ու սահմանել բժշկական արձանագրություններ, հատկապես զբոսաշրջության այդ ձևի համար: Բժշկական ընթացակարգերը, որոնք Հունաստանի իշխանությունների հսկողության ներքո կկիրառվեն ճամփորդանավերում, հիմնված են Եվրոպական միության հրապարակված չափորոշիչների՝ «ԵՄ-ի առողջ դարպասներ»-ի վրա։ Բացի այդ՝ դրանք հարմարեցվել են հունական օրենսդրությանն ու ազգային պայմաններին»։