Թուրքիան պետք է պատժվի. Մակրոն

Ելիսեյան պալատում Կիպրոսի նախագահ Նիկոս Անաստադիադեսի հետ հանդիպման ընթացքում Ֆրանսիայի նախագահ Էմանուել Մակրոնը հայտարարել է, որ Թուրքիան պետք է պատժվի Հունաստանի և Կիպրոսի ինքնիշխան իրավունքները ոտնահարելու համար. հայտնում է Euronews-ի թուրքական ծառայությունը։

Մակրոնը նշել է, որ Ֆրանսիան մշտապես Կիպրոսի և Հունաստանի կողքին է. «Անընդունելի է ԵՄ անդամ պետության ինքնիշխան իրավունքների ոտնահարումը կամ դրանց նկատմամբ սպառնալիքները», - ընդգծել է Մակրոնը։

Հիշեցնենք, որ հուլիսի 21-ից մինչև օգոստոսի 2-ը Թուրքիան հունական և կիպրական ջրերում իրականացնելու է ապօրինի որոնողական աշխատանքներ։ Թուրքական հետազոտական նավին ուղեկցելու են տասնյակ ռազմանավեր։ Երեկ հայտնի էր դարձել, որ հունական զորքերը բերվել են բարձր պատրաստության, իսկ Կիպրոսում գտնվող երկրի ԳՇ պետը շտապ վերադարձել է երկիր։