Ֆրանսիայում հանրային վայրերում դիմակ կրելը պարտադիր կդառնա

Դիմակների կրումը պարտադիր կդառնա Ֆրանսիայի բոլոր փակ տիպի հասարակական վայրերում՝ հաջորդ շաբաթվանից. այս մասին հայտարարել է երկրի վարչապետ Ժան Կաստեքսը:

Մինչ այժմ դիմակները կրելը միայն հասարակական տրանսպորտում էր պարտադիր: Երեքշաբթի օրը Ֆրանսիայի նախագահ Էմանուել Մակրոնը հայտարարել էր կորոնավիրուսի  ակտիվացման որոշ նշանների մասին և հանդես եկել օգոստոսի 1-ից փակ հասարակական վայրերում դիմակների պարտադիր կրելու օգտին:

«Մենք դիտարկել ենք այդ միջոցների ներդրման հնարավորությունը օգոստոսի 1-ից: Բայց ես լսել եմ, որ այդ ժամկետը շատ ուշ է թվում ... Ուստի հրամանագիրը ուժի մեջ կմտնի հաջորդ շաբաթվա սկզբից», - ասել է Կաստեքսը:

Համաձայն վերջին տվյալների՝ Ֆրանսիայում ավելի քան 30 հազար մարդ դարձել է կորոնավիրուսի զոհ, գրանցվել է հիվանդության ավելի քան 173 հազար դեպք: