Ահաբեկիչները հարձակվել են Իդլիբի և Հալեպի բնակավայրերի վրա

«Ջաբհաթ ան-Նուսրա» ահաբեկչական խմբավորումը կրակ է բացել Սիրիայի Իդլիբ և Հալեպ նահանգներում գտնվող բնակավայրերի վրա. այս մասին հայտարարել է Սիրիայի պատերազմող կողմերի հաշտեցման ռուսական կենտրոնի ղեկավար ծովակալ Ալեքսանդր Շերբիցկին:

«Արձանագրվել է Իդլիբ նահանգի Ռուայխա գյուղի վրա մեկ, Ուրում էլ-Կուբրա գյուղի վրա մեկ, Հալեպի նահանգի Ուրում Էլ Սուսրա գյուղի վրա էլ երկու հրետակոծություն՝  ահաբեկչական «Ջաբհաթ ալ-Նուսրա» կառույցի դիրքերից», - նշել է նա:

Անցած մեկ օրվա ընթացքում Թուրքիայի կողմից վերահսկվող ապօրինի զինված խմբավորումների կողմից Իդլիբի ապաէսկալացիոն գոտում հրետակոծումներ չեն գրանցվել:

Շերբիցկին հավելել է, որ պատերազմող կողմերի հաշտեցման ռուսական կենտրոնի և թուրքական կողմի միջև գործնական փոխգործակցության համար հատուկ շարունակական հաղորդակցման գործընթացը շարունակում է գործել: