ԱՄՆ պետքարտուղարության՝ կրոնական ազատությունների վերաբերյալ զեկույցում Թուրքիան դարձյալ քննադատությունների է ենթարկվել

ԱՄՆ Պետքարտուղարությունը հրապարակել է 2019 թ. տարբեր երկրներում կրոնական ազատությունների վերաբերյալ զեկույցը, որում հերթական անգամ ուշադրություն է հրավիրվում Թուրքիայում կրոնական ազատությունների վրա։

Զեկույցում տեղ է գտել Պոլսո 85-րդ պատրիարք Սահակ Մաշալյանի ընտրության գործընթացում պետական միջամտությունը, որի մասին ահազանգում էին պոլսահայ գործիչները։

Բացի այդ, մտահոգիչ է նաև կրոնական փոքրամասնությունների, մասնավորապես հույների և հայերի կրթություն ստանալու խնդիրները։

Զեկույցն անդրադառնում է նաև վերջին մի քանի շաբաթներում քննարկվող Սբ Սոֆիայի տաճարը դարձյալ մզկիթի վերածելու հարցին, որը դժգոհություններ է առաջացրել հատկապես հույների մոտ։

Զեկույցը նաև հիշեցնում է անցյալ տարի թուրքական ATV հեռուստաընկերությամբ կրոնական գործիչ և հաղորդավար Նիհաթ Հաթիփօղլուի կողմից Արթուր  անունով 13-ամյա հայ երեխայի՝ ուղիղ եթերով կրոնափոխության ցավալի դեպքը։