Կոլորադոյի Ներկայացուցիչների պալատը միաձայն ընդունել է դպրոցներում Հայոց ցեղասպանության ուսուցման մասին օրինագիծը

ԱՄՆ Կոլորադո նահանգի Ներկայացուցիչների պալատը հունիսի 5-ին միաձայն ընդունել է պետական դպրոցներում Հայոց ցեղասպանության և Հոլոքոստի ուսուցման վերաբերյալ 1336 օրինագիծը. հայտնում է Asbarez.com-ը։

Ամերիկայի Հայ դատի հանձնախումբը (ANCA) շնորհակալություն է հայտնել Ներկայացուցիչների պալատի անդամներ Դաֆնա Ջենեթին և Էմիլի Սիրոտային, սենատորներ Սթիվ Ֆենբերգին և Դենիս Հիսեյին, ինչպես նաև պալատի «պատվավոր հայ» անդամներ Դանեյա Էսգարին և սենատոր Դոմինիկ Մորենոյին՝ այս օրինագծին աջակցելու և այդ գործընթացում ի սկզբանե հայ համայնքին ներգրավելու համար։

Կոլորադոյի նահանգի Ներկայացուցիչների պալատի դեմոկրատ անդամ Դանեյա Էսգարը Twitter-ում նշել է, որ «երբեք չէր լսել Հայոց ցեղասպանության մասին, մինչև որ այդ մասին իրեն պատմեց հայ ընկերը» և չի հասկանում, թե ինչու իրենք երբեք չեն խոսացել այդ ազգի (հայերի) ցեղասպանության մասին։ «Մենք պետք է անենք ավելին։ Մեզ համար կարևոր է, ուսանողների սովորեցնել այդ հրեշագործությունների մասին», - նշել է Էսգարը։

Նախատեսվում է, որ օրինագիծը կքննարկվի Կոլորադոյի Սենատում, այնուհետև այն կուղարկվի նահանգապետի ստորագրությանը: