Վրացական ընդդիմությունը խորհրդակցություններ է սկսում ապագա վարչապետի թեկնածության շուրջ

Վրացական ընդդիմության մի մասը ցանկանում է «Նոր Վրաստան» կուսակցության առաջնորդ Գեորգի Վաշաձեին տեսնել որպես երկրի հաջորդ վարչապետ:

 «Օրենք և արդարություն» քաղաքական միության ղեկավար Տակո Չարկվիանին կարծում է, որ Վաշաձեն պետք է դառնա ընդդիմության միասնական թեկնածու՝ նրան անվանելով «երիտասարդ բարեփոխիչ»:

Ավելի վաղ, Վաշաձեն ինքն էր հաստատել, որ մասնակցել է միասնական թեկնածուի առաջադրման վերաբերյալ խորհրդակցություններին:

Սակայն ընդդիմության մյուս ուժերը չեն շտապում աջակցել Վաշաձեին: «Միացյալ ազգային շարժման» ներկայացուցիչ Զաալ Ուդումաշվիլին նախօրեին ասել է, որ Վաշաձեի թեկնածությունը կուսակցությունում չի քննարկվել և չի քննարկվելու:

Վրաստանում խորհրդարանական ընտրությունները պետք է անցկացվեն այս տարվա հոկտեմբերին՝ նոր համակարգով: Եթե հաստատվեն Սահմանադրության փոփոխությունները, 130 պատգամավոր մուտք կգործի խորհրդարան համամասնական, իսկ 20-ը՝ մեծամասնության ցուցակով։