Ինչու՞ այլևս չեն հրապարակվում կորոնավիրուսից ապաքինվածների մասին տվյալները. ԱՀԿ պարզաբանումը. ՌԻԱ Նովոստի

Առողջապահության համաշխարհային կազմակերպությունը դադարել է տվյալներ հրապարակել աշխարհում կորոնավիրուսային վարակից ապաքինվածների թվի մասին. պատճառն այն է՝ ոչ բոլոր երկրներն են հայտնում այդ տվյալները. գրում է «ՌԻԱ Նովոստի»-ն՝  ԱՀԿ-ի պաշտոնական ներկայացուցիչ Թարիկ Յազարևիչի խոսքերին հղումով. հայտնում է Yerkir.am-ը։

«Ինչ վերաբերում է Չինաստանի սահմաններից դուրս ապաքինման դեպքերին, ապա մենք չունենք տարբեր աղբյուրներից միասնական տվյալներ այն մասին, թե քանի մարդ է պաշտոնապես բուժվել COVID-19-ից, քանի որ ոչ բոլոր երկրներն են պարբերաբար հաղորդում այդ տվյալները»- հստակեցրել է նա:

Միևնույն ժամանակ Յազարևիչը հիշեցրել է՝ COVID-19-ը նոր հիվանդություն է, հետևաբար՝ անհրաժեշտ է ավելի շատ համաճարակաբանական տվյալներ ստանալ այն մասին, թե ինչպես կարելի է որոշել, որ հիվանդը լիովին ապաքինվել է։

Ըստ ԱՀԿ-ի՝ հիվանդը կարող է դուրս գրվել հիվանդանոցից, երբ առնվազն 24 ժամվա ընթացքում վերջինիս կրկնակի թեստը բացասական պատասխան է ցույց տվել։