Իդլիբի իրավիճակը հեռախոսով քննարկել են Պուտինն ու Էրդողանը

ՌԴ նախագահ Վլադիմիր Պուտինն ու Թուրքիայի նախագահ Ռեջեփ Թայիփ Էրդողանը հեռախոսազրույց են ունեցել, որի ընթացքում քննարկել են Իդլիբի իրավիճակը։ Ըստ Yerkir.am-ի՝ այս մասին տեղեկացնում է ՌԻԱ «Նովոստի»-ն։

«Էրդողանը հայտնել է Իդլիբում սիրիական ռեժիմի զսպման և այնտեղ հումանիտար ճգնաժամի կանխարգելման անհրաժեշտության մասին։ Մեր նախագահը նաև ընդգծել է, որ Իդլիբում իրավիճակի կարգավորումը պետք է տեղի ունենա Սոչիի համաձայնագրի լիարժեք իրագործման հիման վրա»,- ասված է Թուրքիայի նախագահի աշխատակազմի տարածած հաղորդագրության մեջ։

Երկու երկրների առաջնորդները նաև վերահաստատել են իրենց հավատարմությունը Սիրիայի վերաբերյալ բոլոր նախորդ համաձայնագրերին։