ԵԱՀԿ-ն ափսոսանք է հայտնել Ադրբեջանում լրագրողների նկատմամբ կիրառված բռնության համար

ԵԱՀԿ-ի ԶԼՄ ազատության հարցերով ներկայացուցիչ Արլեմ Դեզիրը ափսոսանք է հայտնել երեկ Բաքվում Կենտրոնական ընտրական հանձնաժողովի շենքի դիմաց բողոքի ակցիայի ժամանակ լրագրողների նկատմամբ կիրառված բռնության, ձերբակալությունների համար. ըստ Yerkir.am-ի՝ հայտնում է «Թուրան» լրատվական գործակալությունը:

«Ես շատ անհանգստացած եմ ձերբակալությունների, բռնության դեպքերի և իրավապահ մարմինների դաժան վերաբերմունքի համար ըննդեմ լրագրողների, որոնք լուսաբանում էին հանրային բողոքի ակցիան: Դա հատկապես անթույլատրելի է, քանզի լրագրողները լուսաբանում էին այնպիսի դեպք, որն ունի հանրային հետաքրքրություն՝ կապված վերջերս տեղի ունեցած ընտրությունների հետ», - հայտարարել է Դեզիրը:

2020 թ. փետրվարի 11-ին նվազագույնը 8 լրագրող (ադրբեջանական «Ամերիկայի ձայն», «Ազատություն» և «Meydan TV» լրատվամիջոցներից) հարձակումների և բռնության էին ենթարկվել իրավապահների կողմից ցույցը լուսաբանելու ժամանակ, որը դաժանորեն ցրվել է:

Դեզիրը հատկապես ընդգծել է Bastainfo.com կայքի խմբագիր Մուսթաֆա Հաջիբեյլիի դեպքը, ով դաժանորեն ծեծի էր ենթարկվել՝ մինչև անգամ կյանքին վտանգ սպառնալու աստիճան, իսկ Այնուր Էլգյունեշն ու Սևինչ Վաքիֆքըզըն դեմքի և գլխի շրջանում լուրջ վնասվածքներ էին ստացել:

Դեզիրը կոչ է արել իշխանություններին հետաքննել այդ դեպքերը և պատասխանատվության ենթարկել մեղավորներին: