Սոմալիում ահաբեկչության հետևանքով ավելի քան 90 մարդ է զոհվել

Սոմալիի մայրաքաղաք Մոգադիշոյում տեղի ունեցած ահաբեկչության հետևանքով ավելի քան 90 մարդ է զոհվել` այդ թվում նաև չորս օտարերկրացի, Twitter սոցիալական կայքի իր էջում հայտնել է Սոմալիի խորհրդարանի անդամ Աբդիրիզակ Մուհամմեդը:

Հայտարարության մեջ ասվում է, որ զոհվել է 17 սոմալեցի ոստիկան, 73 խաղաղ բնակիչ և 4 օտարերկրացի:

Տեղեկությունների համաձայն` ականապատված ավտոմեքենայի պայթյունը տեղի է ունեցել շաբաթ օրն առավոտյան` Սոմալիի մայրաքաղաքի ծանրաբեռնված անցակետում: Նշվում է, որ հարձակման թիրախն է եղել հարկային ծառայությունը, պայթյունը գրանցվել է աշխատանքային պիկ ժամին:

Դեռևս որևէ ահաբեկչական կազմակերպություն չի ստանձնել կատարվածի պատասխանատվությունը` չնայած որ նման ձեռագիրը նման է «Ալ Քաիդայի» հետ կապված իսլամիստական «Ալ-Շաբաբ» խմբավորմանը, որը նախկինում ահաբեկչական մի շարք գործողություններ է իրականացրել Աֆրիկայի արևելքում գտնվող Քենիայում և Ուգանդայում: