Վրաստանում առաջարկում են տարբեր գերատեսչությունների բաժանել 2018-ին միավորված ԿԳՄՍ նախարարությունը

Վրաստանի կրթության, գիտության, մշակույթի և սպորտի նախարարությունն անհրաժեշտ է բաժանել մի քանի գերատեսչությունների: Երեկ այսպիսի հայտարարություն է արել «Լելո» շարժման քաղխորհրդի անդամ Մեդեա Մետրևելին. ըստ yerkir.am-ի՝ հայտնում է «Ռուսթավի-2» հեռուստաալիքը:

«Տագնապեցնում է այն, որ կառավարությունը չունի մեր երկրի մշակույթի և  ստեղծագործական ինդուստրիայի զարգացման որևէ տեսլական»,- ասել է նա:

Մետրևելին ընդգծել է վրացական մշակույթի կարևորությունը՝ որպես քաղաքական և տնտեսական գործիքի, նաև հայտարարել, որ 2018-ի բարեփոխմամբ, որով կրթության և գիտության ու մշակույթի նախարարությունները միավորվեցին, ցավոտ հարված է  հասցվել մշակույթին:

Հարկ է նշել, որ տարբեր նախարարություններ մեկում միավորելու առիթով քննադատություններ շատ են հնչել Վրաստանում, ընդ որում՝ բյուջեի՝ ակնկալվելիք զգալի տնտեսում դրան չի հետևել: