Սիրիայում ձերբակալվել է ալ Բաղդադիի քույրը

Երկուշաբթի թուրքական ուժերը Սիրիայի հյուսիսում ձերբակալել են «Իսլամական պետություն» ահաբեկչական խմբավորման պարագլուխ Աբու Բաքր ալ Բաղդադիի քրոջը. ըստ Yerkir.am-ի՝ հայտնում է Reuters գործակալությունը՝ Թուրքիայի իշխանությունների բարձրաստիճան ներկայացուցչին հղումով:

«Ռասմիա Ավադը ձերբակալվել է Ազազ բնակավայրի մոտակայքում: Մենք լիահույս ենք, որ ալ Բաղդադիի քրոջից արժեքավոր տեղեկություններ կստանանք ԻՊ-ի ներքին գործունեության մասին»,- նշել է պաշտոնյան:

ԻՊ պարագլխի քրոջը ներկայումս հարցաքննում են: Ռասմիա Ավադի հետ ձերբակալվել են նրա ամուսինն ու հարսը:

Yerkir.am-ն ավելի վաղ տեղեկացրել էր, որ ԱՄՆ նախագահ Դոնալդ Թրամփը հոկտեմբերի 27-ին հայտարարել էր ԻՊ պարագլխի ոչնչացման մասին: Նրա պնդմամբ՝ ալ Բաղդադին ոչնչացվել էր Իդլիբ նահանգում հատուկ գործողության ընթացքում: Թրամփը գործողության անցկացմանն օժանդակելու համար շնորհակալություն էր հայտնել Ռուսաստանին, Իրաքին, Սիրիային եւ Թուրքիային: