Բրիտանական խորհրդարանը հավանություն է տվել դեկտեմբերի 12-ին արտահերթ ընտրություններ անցկացնելուն

Բրիտանիայի խորհրդարանը հավանություն տվեց Միացյալ Թագավորության վարչապետ Բորիս Ջոնսոնի առաջարկությանը՝ արտահերթ խորհրդարանական ընտրություններ անցկացնել դեկտեմբերի 12-ին։ Չորեքշաբթի օրենսդիր մարմնի վերին՝ Լորդերի պալատը կողմ քվեարկեց, որպեսզի մեկուկես ամիս հետո երկրում տեղի ունենան ընտրություններ. հայտնում է ՏԱՍՍ-ը։

Հաշվի առնելով, որ երեքշաբթի կառավարության՝ ընտրությունների անցկացման մասին առաջարկն արժանացել էր խորհրդարանի ստորին՝ Համայնքների պալատի հավանությանը, այժմ օրինագիծն անցել է խորհրդարանական քննարկումների բոլոր փուլերը։ Օրենքի կարգավիճակ այն պետք է ստանա, երբ ստորագրվի Եղիսաբեթ II թագուհու կողմից։ Այդ պատճառով հատկացվում է մեկ շաբաթից մի փոքր քիչ ժամանակ, քանի որ, որպեսզի ընտրությունները տեղի ունենան նշված ժամկետում, խորհրդարանը պետք է ընտրարշավի անցկացման համար լուծարվի նոյեմբերի 6-ից ոչ ուշ։