96 տարի անց ունենք ֆաշիստական հանրապետություն. Փայլանը շնորհավորել է Թուրքիային

Թուրքիայի Ազգային մեծ ժողովի հայազգի պատգամավոր, քրդամետ Ժողովուրդների դեմոկրատական կուսակցության անդամ Կարո Փայլանը սոցցանցերի իր էջերում անդրադարձել է Թուրքիայի Հանրապետության հիմնադրման 96-րդ տարեդարձին: Ընդդիմադիր պատգամավորը շնորհավորելու փոխարեն քննադատել է Թուրքիային:

«Հանրապետության տոնի առավոտյան Ջիզրեի (հայերեն՝ Գզիրա) քաղաքապետարանում պաշտոնակատար է նշանակվել: Այլ խոսքերի կարիք չկա: 96 տարի անց էլ այն, ինչ ունենք, ֆաշիստական հանրապետությունն է: Եկեք դա չնշենք, վերացնենք նման բանը…»,- գրել է Փայլանը:

Թուրքիայում վերջին մի քանի ամիսներին հիմնականում քրդական բնակչություն ունեցող քաղաքներում ընտրված քուրդ քաղաքապետերը հեռացվում են իրենց պաշտոններից և նշանակվում են ժամանակավոր կառավարիչներ, ինչը մեծ դժգոհություն է առաջացրել ինչպես Թուրքիայում, այնպես էլ երկրի սահմաններից դուրս: