Վերջին 30 տարիների ընթացքում առաջին անգամ Ներկայացուցիչների պալատի լիագումար նիստում քվեարկության կդրվի Ցեղասպանությունը ճանաչող բանաձև

Վերջին 30 տարիների ընթացքում առաջին անգամ ԱՄՆ Կոնգրեսի Ներկայացուցիչների պալատի լիագումար նիստում քվեարկության պիտի դրվի Հայոց ցեղասպանությունը ճանաչող բանաձևը. տեղեկացնում է  ԱՄՆ Հայ Դատի հանձնախումբը:

Ներկայացուցիչների պալատի դեմոկրատ մեծամասնության ղեկավար Սթենի Հոյըրը հայտնել է, որ Հայոց ցեղասպանությունը ճանաչող թիվ 296 բանաձևը քվեարկության պիտի դրվի երեքշաբթի՝ հոկտեմբերի 29-ին, Սիրիա ներխուժելու հարցով Թուրքիայի դեմ պատժամիջոցներ սահմանող թիվ 4695 բանաձևի հետ համատեղ:

Հայտնենք՝ ԱՄՆ Հայ Դատի հանձնախումբը հեռախոսային արշավ էր սկսել՝ ANCA.org/call հասցեով, որի նպատակն էր մղել կոնգրեսականներին՝ քվեարկել բանաձևի օգտին:

«Մինչ նախագահը տեղի է տալիս Էրդողանի ճնշումներին, Կոնգրեսի պարտականությունն է պաշտպանել ամերիկացիների շահերը՝ ցույց տալով, որ չի կարելի արտոնել բռնապետերին, որպեսզի առևանգեն Միացյալ Նահանգների արտաքին քաղաքականությունը, և հաստատելու համար, որ ամերիկյան արժեքները ծախու չեն»,- նշել է ԱՄՆ Հայ Դատի հանձնախմբի գործադիր տնօրեն Արամ Համբարյանը: