«Բիթլզ» դահիճների խմբից զինյալները դուրս են բերվել Սիրիայից. Թրամփ

ԱՄՆ նախագահ Դոնալդ Թրամփը հաստատել է, որ ամերիկացի զինվորականները Սիրիայից դուրս են բերել «Իսլամական պետություն» խմբավորման երկու զինյալի, որոնք «Բիթլզ» անունով հայտնի դահիճների խմբից են:

ԱՄՆ նախագահն իր թվիթերյան էջում հայտնել է, որ ԱՄՆ-ը Սիրիայում գլխատումների հետ կապ ունեցող ԻՊ երկու զինյալի արդեն դուրս է  բերել ԱՄՆ-ի կողմից վերահսկվող անվտանգ վայր՝ Սիրիայում ծավալվող իրադարձությունների ֆոնին: «Նրանք վատերից ավելի վատն են»,- գրել է նա:

Ավելի վաղ Washington post-ը տեղեկություն էր տարածել, որ ամերիկացի զինվորականները Սիրիայում հսկողության տակ են վերցրել մոտավորապես 40 մարդու, ենթադրաբար՝ «Իսլամական պետության» զինյալների: