Ռուսաստանը բաց է G7- ի հետ երկխոսության համար. Պուտին

ՌԴ նախագահ Վլադիմիր Պուտինը Արևելյան տնտեսական ֆորումի լիագումար նիստում հայտարարեց, որ Ռուսաստանը պատրաստ է երկխոսության G7-ի հետ: Այս մասին հայտնում է ՌԻԱ «Նովոստի»-ն։

ՌԴ նախագահի խոսքով՝  կարծիքների փոխանակումը միշտ էլ ձեռնտու է, նույնիսկ եթե «իրականացվում է բարձր տոնով»:

«Որքան հասկանում եմ, այս անգամ այդպես էլ եղել է «Յոթնյակում»։ Դա, միևնույն է, օգտակար է։ Հենց այդ պատճառով էլ մենք չենք հրաժարվում համագործակցության որևէ ձևաչափից»,- հավելել է Պուտինը։

Իր հերթին Ճապոնիայի վարչապետ Սինձո Աբեն նշել է, որ բարձրացրել է «Մեծ յոթնյակ»-ի ձևաչափը Ռուսաստանի մասնակցությամբ վերականգնելու հարցը Ֆրանսիայում վերջերս կայացած G7 հանդիպմանը:

«Միջազգային խնդիրների լուծման համար կարևոր դեր է խաղում Ռուսաստանը, հետևաբար, ես բարձրացրել եմ Ռուսաստանի՝ ձևաչափին վերադառնալու թեման»,- նշել է Աբեն։

Արևելյան տնտեսական 5-րդ ֆորումը անցկացվում է սեպտեմբերի 4-6-ը Վլադիվոստոկում։