Հայերը նույնպես զգում են Էրդողանի թշնամանքի լարվածությունը. ամերիկացի հոգևորականի ելույթը` Կոնգրեսում` Թուրքիայում քրիստոնյաների վիճակի վերաբերյալ

Ամերիկացի հոգևորական Էնդրյու Բրանսոնը, որն անազատության մեջ է եղել Թուրքիայում, ելույթով հանդես է եկել ԱՄՆ Կոնգրեսում և խոսել  Թուրքիայում կրոնական փոքրամասնությունների վիճակի մասին՝ նշելով, որ հայերը նույնպես զգում են «Էրդողանի թշնամանքի լարվածությունը»: Այս մասին հայտնում է ՀՅԴ ԱՄՆ Հայ դատի հանձնախումբը:

«Էրդողանի ռեժիմն առանձնապես թշնամական է. շատ թուրքերի համար կարևորը մուսուլմանների անհատականությունն է: Այո՛, ես այն կարծիքին եմ, որ փոքրամասնությունները, մասնավորապես` պատմականորեն քրիստոնյա խմբերը Թուրքիայում` հայերը կամ ուղղափառները, զգում են այդ լարվածութունը»,- ասել է Բրանսոնը:

Նշենք, որ քահանան շուրջ երեք տարի անազատության մեջ է եղել Թուրքիայում: Նա  մեղադրվում էր քուրդ զինված խմբերի հետ կապեր ունենալու և իսլամական քարոզիչ Ֆեթուլլահ Գյուլենին աջակցելու մեջ, որը Թուրքիայի իշխանությունների համոզմամբ` 2016 թվականի հեղաշրջման փորձի կազմակերպիչն է։ Բրանսոնին ազատ են արձակել 2018 թվականի հոկտեմբերին: