Վրաստանում ցույցերի ժամանակ տուժել է 240 մարդ, 102-ը հիվանդանոցում են

Երեկ Վրաստանում տեղի ունեցած  բողոքի ակցիաների ընթացքում տուժել է 240 մարդ, որոնցից 102-ը շարունակում են հիվանդանոցում մնալ: Այդ մասին հայտարարել է Վրաստանի առողջապահության նախարարի առաջին տեղակալ Զազ Բուխուան. հայտնում է 1tv.ge-ն:

Նրա խոսքով` տուժածներից մեկի վիճակը ծանր է, երկուսին վիրահատում են:

Երեկ Վրաստանի խորհրդարանում անցկացվող` Ուղղափառության միջխորհրդարանական վեհաժողովի ժամանակ սկանդալ է տեղի ունեցել: Վրացի  ընդդիմադիր պատգամավորներին դուր չի եկել, որ Ռուսաստանի Պետդումայի պատգամավոր Սերգեյ Գավրիլովը, որը նախագահում էր նիստը, նստել է Վրաստանի խորհրդարանի խոսնակի տեղում: Ավելի ուշ ակտիվիստները հավաքվել են խորհրդարանի շենքի մոտ և այրել ՌԴ նախագահ Վլադիմիր Պուտինի նկարը: Այնուհետև իրավիճակն ավելի է լարվել:

Գիշերը Թբիլիսիի խորհրդարանի մոտ հարյուրավոր ցուցարարներին ցրելու համար Վրաստանի ՆԳՆ-ն կիրառել է ջրցաններ, ռետինե փամփուշտներ, զրահամեքենա, հրշեջ մեքենա և լուսաձայնային նռնակներ: Նրանք պահանջում էին ՆԳՆ ղեկավարի և խորհրդարանի նախագահի հրաժարականը: