Արցախին 1.5 միլիոն դոլարի օգնություն կտրամադրվի ականազերծման ծրագրի իրականացման համար

ԱՄՆ Կոնգրեսը հաստատել է փոփոխությունը, որով առաջարկվում է 1.5 մլն դոլարի չափով օգնություն տրամադրել Արցախում ականազերծման ծրագրին, ինչպես նաև վերականգնման ծառայություններին: Այս մասին տեղեկացնում է ՀՅԴ ԱՄՆ Հայ դատի հանձնախումբը:

Նշվում է, որ 2020 թ. ֆիսկալ տարվա արտասահմանյան օգնության մասին օրինագծի փոփոխությունը ներկայացրել է Թիջեյ Քոքսը:

ՀՅԴ ԱՄՆ Հայ դատի հանձնախմբի նախագահ Րաֆֆի Համբարյանի խոսքով` կոնգրեսական Թիջեյ Քոքսն առաջին իսկ օրվանից զբաղվել է Կալիֆոռնիայում բնակվող հայ համայնքի համար կարևորագույն հարցերի լուծմամբ:

«Իմ կողմից  ներկայացված փոփոխությունը կապահովի Լեռնային Ղարաբաղում ականազերծման և վերականգնման ծրագրերի շարունակական ֆինանսավորումը: Ես վճռական եմ տրամադրված աշխատել Կոնգրեսի Հայկական հարցերով հանձնախմբի իմ գործընկերների,  ՀՅԴ ԱՄՆ Հայ Դատի հանձնախմբի և HALO Trust-ի հետ` ապահովելու համար Լեռնային Ղարաբաղի համայնքների վերականգնումն այն նպատակով, որ առաջիկայում տարածաշրջանն ազատ լինի ականներից»,- շեշտել է Թիջեյ Քոքսը: