Այսօր Սայաթ-Նովայի ծննդյան օրն է

Այսօր հայ բանաստեղծ-աշուղ, ժողովրդական-աշուղական նոր դպրոցի՝ արևելյան ձևի հիմնադիր Հարություն Սայադյանի կամ Սայաթ- Նովային ծննդյան օրն է: Հռչակավոր աշուղն այս տարի կդառնար 307 տարեկան:

Սայաթ-Նովայի կենսագրական տվյալները հիմնականում քաղված են նրա ստեղծագործություններում տեղ գտած հիշատակումներից` տարբեր ուսումնասիրողների ուժերով, և հաճախ իրարամերժ են։

Սայաթ-Նովայի խաղերում եղած ծածկագրությունների վերծանությունների հիման վրա տարբեր ուսումնասիրողներ նրա ծննդյան տարին համարել են 1712, 1717, 1722 թվականները։ Երգչի աոաջին կենսագիր Գևորգ Ախվերդյանն առաջարկել է նրա ծննդյան 1712 թվականը, որը հետագայում վիճարկվել է, և տարբեր փաստարկների ու հաշվարկների հիման վրա առաջարկվել են ծննդյան նոր թվականներ' 1711-1726-ի սահմաններում: Առանձին նշվել են նաև 1710 և 1724 թվականները։

Մորուս Հասրաթյանը 1942 թվականին Սայաթ-Նովայի խաղերից մեկի վերլուծության հիման վրա պնդել է, թե աշուղի ծննդյան տարեթիվը 1717-ն է։

Սայաթ-Նովան իր տաղերում մեկ իրեն թիֆլիսեցի է կոչել, մեկ հալեպցի կամ ադանացի։ Ըստ Մորուս Հասրաթյանի` միջին դարերում և մինչև 20-րդ դարի սկզբները, հատկապես` Արևելքի ու Կովկասի մարդիկ իրենց ծննդավայրը համարել են ոչ այնքան իրենց, որքան իրենց հոր և պապի ծննդավայրը: