«Իմ քայլի» վերաբերմունքը ճշտեք խմբակցությունից. ԱԺ նախագահը` ՍԴ դատավորի թեկնածուի մասին

Սահմանադրական դատարանի դատավորի տեղի համար առաջադրված թեկնածու Արթուր Վաղարշյանից Ազգային ժողովի նախագահ Արարատ Միրզոյանը դրական տպավորություն է ստացել: Լրագրողներն այսօր Միրզոյանից խորհրդարանում հետաքրքրվեցին` ինչո՞ւ մեկ տարի շարունակ խորհրդարանականները չեն կարողանում դատավոր ընտրել: Ի պատասխան` նա ընթացակարգը ներկայացրեց` նշելով, որ թեկնածուներ են ներկայացվում, ելույթ ու հարցուպատասխան է լինում, ինչից հետո պատգամավորներն իրենց ստացած տպավորությունն արտահայտում են քվեարկությամբ: «Օրինաչափություն տեսնելու անհրաժեշտություն առայժմ չեմ տեսնում»,- ասաց ԱԺ նախագահը:

Անդրադառնալով ՍԴ նախագահ Հրայր Թովմասյանի հրաժարականին՝ Արարատ Միրզոյանը նշեց, որ այն կարծիքին չէ, թե ԱԺ նախագահը պետք է հայտարարություն անի ՍԴ որևէ անդամի վերաբերյալ, այդ թվում` ՍԴ նախագահին: «Եթե «Իմ քայլի» վերաբերմունքից եք հետաքրքրվում, հարցրեք դա խմբակցությունից»,- հավելեց նա: