Թուրքիան դադարեցրել է Իրանից նավթի գնումը

Reuters լրատվական գործակալության հետ զրույցի ընթացքում անունը նշել չցանկացած թուրք պաշտոնյան հայտնել է, որ Թուրքիան մայիս ամսից դադարեցրել է Իրանից նավթի գնումը. հաղորդում է BBC–ի թուրքական ծառայությունը` Reuters –ին հղումով:

ԱՄՆ-ն Իրանի նկատմամբ կիրառած պատժամիջոցների շրջանակում 8 երկրի` ներառյալ Թուրքիայի, արտոնություններին վերջ էր տվել:

«Իրանից արդեն նավթ չենք գնում: Արտոնյալ 8 երկրներից մեկն էինք և արդեն պատրաստ ենք ենթարկվել պատժամիջոցներին»,-գործակալության հետ զրույցում նշել է թուրք պաշտոնյան:

Թուրքիայի ամենամեծ  նավթաարդյունաբերական Türpraş ընկերությունը փորձել էր Վաշինգտոնին համոզել երկարացնել արտոնությունների ժամկետը:

Պաշտոնյան նաև նշել է, որ Թուրքիան համաձայն չէ ԱՄՆ վարած քաղաքականությանը, սակայն, «որպես ռազմավարական դաշնակից, ստիպված են հարգանք ցուցաբերել ԱՄՆ-ի որոշման նկատմամբ»: