Հայոց ցեղասպանության հարցում Թրամփն առաջնորդվեց «սկզբում Թուրքիան» սկզբունքով. ՀՅԴ ԱՄՆ Հայ Դատի հանձնախումբ

ՀՅԴ  ԱՄՆ Հայ դատի հանձնախմբի գրասենյակն անդրադարձել է նախագահ Դոնալդ Թրամփի այս տարվա ապրիլքսանչորսյան ուղերձին, որում Միացյալ Նահանգների ղեկավարը կրկին խուսափել է «ցեղասպանություն» եզրույթի կիրառումից՝ փոխարենն օգտագործելով «Մեծ Եղեռն» արտահայտությունը:

«Արդեն երրորդ տարին անընդմեջ Թրամփը հավուր պատշաճի չի դատապարտում Օսմանյան կայսրության իրականացրած ցեղասպանությունը:Այս քաղաքականությունը սկզբնավորվել է Անկարայում՝ թուրք բռնապետերի կողմից, իսկ հետո ամերիկյան նախագահներն այն կիրառել են Վաշինգտոնում:  «Սկզբում Ամերիկան» խոստումը տված Թրամփը Հայոց ցեղասպանության հարցում առաջնորդվում է «սկզբում Թուրքիան» սկզբունքով: Խոստանալով պայքարել քրիստոնյաների նկատմամբ բռնաճնշումների դեմ՝ Թրամփն աջակցեց օտարերկրյա ռեժիմին՝ փոխարենն ազնվորեն ոգեկոչեր մեկդարյա պատմություն ունեցող հանցագործության հիշատակը: Նա խոստացել էր վերականգնել Միացյալ Նահանգների՝ առաջնորդի դերը, սակայն փոխարենն օտարերկրյա բռնապետությանը զիջեց ամերիկյան բարոյական արժեքները: Այժմ մենք հայացքն ուղղում ենք Կոնգրեսին՝ հույս ունենալով, որ այն կցուցաբերի այն առաջնորդությունը, ինչը չկարողացավ անել Սպիտակ տունը»,-ասել է  ՀՅԴ  ԱՄՆ Հայ դատի հանձնախմբի գործադիր տնօրեն Արամ Համբարյանը: