ԲՀԿ-ն և ԼՀԿ-ն դեմ քվեարկեցին, իրենց բնորոշմամբ, «ապագա չունեցող»`ցեմենտի ներմուծման նկատմամբ պետական տուրք կիրառելու առաջարկին

Ազգային ժողովում, մինչ «Պետական տուրքի մասին» ՀՀ օրենքում լրացում կատարելու մասին և կից ներկայացված օրենքի նախագծերի փաթեթի քվեարկությունը, ՀՀ տնտեսական զարգացման և ներդրումների նախարար Տիգրան Խաչատրյանն ասաց, որ նախագիծը քվեարկության կդրվի տնտեսական մշտական հանձնաժողովում առաջարկված տարբերակով, այն է` ներկրվող ցեմենտի հարկում մեկ տարի ժամկետով և առանց կլինկերը հարկելու:

ԲՀԿ-ական պատգամավոր Նաիրա Զոհրաբյանը վարման կարգով իր ելույթում ասաց, որ օրենքները բազմակողմանի պիտի քննարկվեն և հետո միայն քվեարկության դրվեն: Նա ընդգծեց. «Մենք հարգում ենք խորհրդարանի օրենսդիր գործունեությունը և կարծում ենք, որ պետք է քվեարկենք այն օրենքները, որոնք քննարկվում են ամբողջապես, որտեղ սողանցքներ և թեմաներ չկան, որոնք առանձին պիտի հետո քննարկվեն, չկան, դրա համար ԲՀԿ-ն քվեարկելու է դեմ»:

Զոհրաբյանին շարունակելով`ԲՀԿ-ական պատգամավոր Միքայել Մելքումյանն հավելեց, որ օրենքի բովանդակությունը ցույց է տալիս, որ այն ապագա չունեցող օրենք է:

Առաջարկվող օրենքն առաջին ընթերցմամբ ընդունվեց ձայների` 78 կողմ և 42 դեմ  հարաբերակցությամբ: Դեմ քվեարկեցին ԼՀԿ-ն և ԲՀԿ-ն: