Բրազիլիայի նախկին նախագահին մեղադրանք է առաջադրվել կաշառակերության համար. BBC

Բրազիլիայի նախկին նախագահ Միշել Տեմերին կոռուպցիայի համար պաշտոնական մեղադրանքներ են ներկայացվել: Նա մեղադրվում է աշխարհի խոշոր` միս փաթեթավորող JBS SA ընկերությունից չորս ճամպրուկ կանխիկ գումար որպես կաշառք ստանալու մեջ. գրում է BBC-ն:

Տեմերը, որը 2016-2018 թվականներին Բրազիլիայի նախագահն էր, անցյալ շաբաթ  կալանավորվել է` մեղադրվելով հսկայական հանցավոր սինդիկատի կազմակերպման մեջ, որը կաշառքներ էր ստանում:

Նախկին պաշտոնյան հերքում է բոլոր մեղադրանքները: Նա  այս շաբաթ իր փաստաբանների միջնորդությամբ ազատ է արձակվել:

Նշվում է նաև, որ 2017 թ.-ին ոստիկանությունը ձերբակալել էր ոմն Ռոդրիգո դա Ռոշա Լուրեսի: Նրա պայուսակի  մեջ հայտնաբերվել էր 500.000 ռեալ (128.166 դոլար) կանխիկ գումար, որն, ըստ դատախազության տվյալների, JBS-ի սեփականատերերի կողմից կաշառք էր: Դատախազներն այն կարծիքին են, որ Լուրեսը միջնորդ էր Տեմերին գումարը փոխանցելու համար:

Տեմերի փաստաբան Էդուարդո Կառնելոսը հայտնել է, որ առաջադրված մեղադրանքներն իրավական հիմք չունեն: