Թուրքիայի ԱԳՆ-ն արձագանքել է հրեական լոբբիի` Երուսաղեմի վերաբերյալ հայտարարություններին

Թուրքիայի արտաքին գործերի նախարարության մամլո խոսնակ Համի Աքսոյը  Հասարակական կապերի ամերիկա-իսրայելական կոմիտեի (AIPAC)`  երեկ Վաշինգտոնում մեկնարկած ամենամյա ժողովի վերաբերյալ հայտարարություն է տարածել:

«AIPAC-ի ամենամյա ժողովներին մասնակցող որոշ երկրների առաջնորդների` Իսրայելում իրենց դեսպանությունները Երուսաղեմ տեղափոխելու անպատասխանատու որոշումը մեզ անհանգստացնում է: Դեսպանությունների տեղափոխումը Երուսաղեմ միջազգային իրավունքի կոպիտ խախտում է: ՄԱԿ-ը և միջազգային հանրությունը մերժում են  Իսրայելի կողմից Երուսաղեմի բռնակցումը: ՄԱԿ-ը բազմիցս նշել է, որ Արևելյան Երուսաղեմը Պաղեստինի տարածքում գտնվող անկախ, ինքնիշխան մարմին է»,- նրա խոսքերն է մեջբերում «Անադոլու» գործակալությունը:

AIPAC-ը համարվում է հրեական լոբբիի խոշորագույն միջոցառումը, որին մասնակցում են ինչպես ԱՄՆ Կոնգրեսի հանրապետականներն ու դեմոկրատները, այլև մի շարք երկրների ղեկավարներ: Հաղորդվում է, որ ժողովի գլխավոր քննարկման առարկան Երուսաղեմի և Գոլանի բարձունքների հարցն է լինելու: