Աջակցում ենք Ուկրաինայի տարածքային ամբողջականությանը. Թուրքիայի ԱԳՆ

Ղրիմի` Ռուսաստանին միանալու 5-րդ տարելիցի կապակցությամբ Թուրքիայի ԱԳՆ-ն հայտարարություն է տարածել` ի պաշտպանություն Ուկրաինայի:

«Ուկրաինայի մաս կազմող Ղրիմի Ինքնավար Հանրապետությունը 5 տարի առաջ (մարտի 16-ին) իրականացված անօրինական հանրաքվեի հիմքով Ռուսաստանի Դաշնության կողմից բռնակցվել է` ի հեճուկս միջազգային իրավունքին: Այդ առիթով մենք կրկնում ենք, որ այս գործողության արդյունքում առաջացած դրությունը չենք ճանաչում և հաստատում ենք, որ աջակցում ենք Ուկրաինայի ինքնիշխանությանն ու տարածքային ամբողջականությանը:  

Ղրիմի տեղաբնիկ համարվող Ղրիմի թաթար-թյուրքերի դրությունը մեզ համար շարունակում է պահպանել իր առաջնահերթ դիրքը: Թուրքիան շարունակելու է աջակցել Ղրիմի թաթարների ինքնության պահպանմանը և անվտանգության ու խաղաղության մեջ նրանց ապրելու իրավունքին», - Թուրքիայի ԱԳՆ հայտարարությունն է մեջբերում CNN-ի թուրքական ծառայությունը: