ՌԴ դեսպանը հանդիպել է ԱԺ փոխնախագահների հետ

Հ

Հայաստանում Ռուսաստանի Դաշնության արտակարգ և լիազոր դեսպան Սերգեյ Կոպիրկինը այսօր՝ մարտի 6-ին, առանձին–առանձին հանդիպել է Ազգային ժողովի փոխնախագահներ Լենա Նազարյանի և Վահե Էնֆիաջյանի հետ. տեղեկացնում են ԱԺ մամուլի ծառայությունից։

Ողջունելով դեսպանին խորհրդարանում՝ Լենա Նազարյանը կարևորել է հայ-ռուսական բարեկամական ու դաշնակցային հարաբերությունների զարգացումը, խոսել միջխորհրդարանական հարթակներում, մասնավորապես ԱՊՀ ՄԽՎ-ում և ՀԱՊԿ ԽՎ-ում փոխգործակցության խորացումից:

Զրուցակիցներն ընդգծել են երկու երկրների խորհրդարանական նույնանուն հանձնաժողովների միջև համագործակցության սերտացման, շփումների աշխուժացման ու երկուստեք հետաքրքրություն ներկայացնող հարցերի շուրջ քննարկումների իրականացման կարևորությունը:

Վահե Էնֆիաջյանը դեսպանի հետ հանդիպմանը կարևորել է միջխորհրդարանական փոխգործակցությունն ու միջազգային հարթակներում համատեղ աշխատանքը: Նա պատրաստակամություն է հայտնել իր լիազորությունների շրջանակում աջակցել երկկողմ կապերի առավել զարգացմանը:

Պայմանավորվածություն է ձեռք բերվել շարունակել հայ-ռուսական բազմոլորտ օրակարգի շրջանակում քննարկումները՝ հաճախակի դարձնելով հանդիպումները:

Ավելի վաղ դեսպանը հանդիպել էր ԱԺ փոխնախագահ Ալեն Սիմոնյանի հետ։