Անկարայում կբացվի «Քարերի պոեզիա. Անի» ցուցահանդեսը

Թուրքիայի մայրաքաղաք Անկարայի երկրաբանության և արվեստի թանգարանում փետրվարի 21-ին կբացվի «Քարերի պոեզիա. Անի» ցուցահանդեսը:

 «Անատոլիայի մշակույթ» կազմակերպության կողմից նախաձեռնվող ցուցահանդեսին ներկայացվելու են լուսանկարներ պոլսահայ անվանի լուսանկարիչ Արա Գյուլերի արխիվից և ուսումնասիրության կենտրոնից, Աթաթուրքի անվան գրադարանից և ՌԴ գիտությունների ակադեմիայի պատմության և նյութական մշակույթի ինստիտուտի արխիվից:

 Նշվում է, որ կազմակերպիչները ներկայացվելիք ցուցանմուշներով փորձելու են մարդկանց հաղորդակից դարձնել Մետաքսի ճանապարհի հռչակավոր քաղաքներից մեկի` Անիի շքեղությանն ու պատմությանը:

 Ցուցահանդեսը բաց է լինելու մինչև մայիսի 26-ը:

Ermenihaber.am կայքի համաձայն` նույնանուն խորագրով ցուցահանդեսներ 2018-ին տեղի են ունեցել Ստամբուլում, ապա՝ Երևանում՝ քաղաքաշինության կոմիտեի Ալ. Թամանյանի անվան ճարտարապետության ազգային թանգարան-ինստիտուտում: