Առանց Հայաստանի համաձայնության` բելառուս թեկնածուին նշանակելու հարցը չի դիտարկվում. Բելառուսի ԱԳՆ խոսնակ

Արդեն տեղեկացրել ենք, որ Բելառուսի ԱԳՆ մամուլի խոսնակ Անատոլի Գլազը հայտարարել է, որ ՀԱՊԿ գլխավոր քարտուղարի նշանակման գործընթացի ձգձգումը չի բխում կազմակերպության շահերից ու հնարավորինս արագ լուծում է պահանջում:

Բելառուսական news.tut.by կայքը նոր մանրամասներ է հայտնել: Ըստ Գլազի` ՀՀ-ում կայացած ընտրությունները խանգարել են բելառուս թեկնածուի հետ հանդիպմանը, սակայն այժմ իրենք ակնկալում են, որ հայկական կողմն արդեն մոտ ժամանակներս կհայտնի այդ հանդիպման ժամկետների մասին:

«Մեր կողմից մենք տրամադրված ենք Երևանի հետ կառուցողական փոխգործակցության և հույս ունենք փոխըմբռնման հասնել: Ի վերջո, ՀԱՊԿ գլխավոր քարտուղարի պաշտոնը հյուրանոցային համար չէ, որը կարելի է ամրագրել, անգամ` եթե որևէ հնարավորություն չկա դրանից կրկին օգտվելու»,- ասել է Բելառուսի ԱԳՆ խոսնակը:

Գլազը նաև ընդգծել է, որ, առանց Հայաստանի համաձայնության, բելառուս թեկնածուին նշանակելու հարցը չի դիտարկվում: «Մենք դեռ աշխատում ենք կոնսենսուսի որոնման տարբերակի ուղղությամբ»,- ասել է նա: