Իրաքի Քուրդիստանը մեր կարեւոր հարեւանն է. Իրանի ԱԳ նախարար

Պաշտոնական այցով Իրաքում գտնվող Իրանի ԱԳ նախարար Մոհամմադ Ջավադ Զարիֆն ու նրան ընկերակցող ներկայացուցչական պատվիրակությունն այսօր ժամանել են Իրաքի Քուրդիստանի ինքնավարության մայրաքաղաք Էրբիլ:

ԻՌՆԱ-ի տեղեկացմամբ` Էրբիլում Իրանի արտաքին քաղաքական գերատեսչության ղեկավարը հանդիպել է Իրաքի Քուրդիստանի ինքնավարության վարչապետ Նաջիրվան Բարզանիի եւ անվտանգության հարցերով խորհրդական Մասրուր Բարզանիի հետ: Հանդիպման ընթացքում քննարկվել են երկկողմ հարաբերություններն ու հեռանկարները:

Զարիֆը ելույթ է ունեցել Իրանի եւ Էրբիլ նահանգի գործարարների համատեղ ֆորումում: Կարեւորելով Իրաքի Քուրդիստանի ինքնավարության հետ հարաբերությունները` Իրանի ԱԳՆ ղեկավարը նշել է. «Իրաքի Քուրդիստանը մեր կարեւոր հարեւանն է, որի հետ ցանկանում ենք ընդլայնել մեր հարաբերությունները: Իրաքի եւ Սիրիայի քրդերը մեր քույրերն ու եղբայրներն են: Բոլորս ունենք պատմական համատեղ արմատներ եւ տառապել ենք մյուսին պատուհասած աղետներից»: