Ցմահ դատապարտյալ Վահագն Մարուքյանը ազատ է արձակվել

Ցմահ դատապարտյալ Վահագն Մարուքյանը դեկտեմբերի 25-ին ազատ է արձակվել դատարանի դահլիճից։ Այս մասին «Արմենպրես»-ի հետ զրույցում հայտնեցին ՀՀ արդարադատության նախարարության Քրեակատարողական  վարչության հանրային կապերի բաժնից:

Դատարանը հաշվի է առել դատապարտյալի ծանր առողջական վիճակը և պատժի կրման հետ անհամատեղելի հիվանդությունները:

Վանաձորի բնակիչ Վահագն Մարուքյանը կալանավորվել էր 1993 թվականին՝ 19 տարեկանում: Նա  մեղավոր է ճանաչվել Վանաձորի Ռազմական ոստիկանության պետին դիտավորյալ, կանխամտածված սպանության մեջ:

1994 թ.-ին ՀՀ Գերագույն դատարանի դատավճռով նա դատապարտվել է մահապատժի, իսկ 2003 թվականից, ՀՀ նախագահի հրամանագրով, մահապատիժը փոխարինվել է ցմահ ազատազրկմամբ: