ԱՄՆ Հայ դատի գրասենյակը ողջունել է Բաքվում ԱՄՆ դեսպանի նշանակման հարցով քվեարկության հետաձգումը

ԱՄՆ Հայ դատի գրասենյակը (ANCA) ողջունել է Սենատի արտաքին հարաբերությունների հանձնաժողովում Ադրբեջանում ԱՄՆ դեսպանի պաշտոնում նախագահ Դոնալդ Թրամփի առաջադրած Էրլ Լիցենբերգերի թեկնածության հաստատման հարցով քվեարկությունը հետաձգելու որոշումը:

Կազմակերպության պաշտոնական կայքից տեղեկանում ենք, որ քվեարկության հետաձգման պատճառ են հանդիսացել մտահոգությունները, որոնք առաջացել են նախագահի ազգային անվտանգության հարցերով խորհրդական Ջոն Բոլթոնի՝ Ադրբեջանին զենք վաճառելու կոչից հետո:

Հայտնի է, որ Լիցենբերգերի հարցով քվեարկությունը հետաձգվել է, ամենայն հավանականությամբ, մինչև հաջորդ տարի:

ANCA-ն նշում է, որ քվեարկության հետաձգումը հնարավորություն կտա Կոնգրեսին ավելի ուշադիր ուսումնասիրելու Իլհամ Ալիևի ղեկավարած ագրեսիվ ու բռնակալ ռեժիմի հետ երկկողմ հարաբերությունների հարցը: «Այս ամենը կարևոր է հատկապես Բոլթոնի՝ վերջերս արած վիճահարույց ենթադրության ֆոնին, համաձայն որի` ԱՄՆ-ը պետք է սկսի զենք վաճառել Բաքվին»,- ասել է ANCA-ի գործադիր տնօրեն Արամ Համբարյանը: