Հայաստանի և Ադրբեջանի միջև օպերատիվ կապի համար նշանակված են համապատասխան պաշտոնյաներ

Հայաստանի և Ադրբեջանի միջև օպերատիվ կապի համար նշանակված են համապատասխան պաշտոնյաներ և' ՀՀ-ում, և' Ադրբեջանում, որոնց միջոցով էլ իրականացվում է այն: Այս մասին լրագրողներն հայտնեց ՀՀ պաշտպանության նախարարի պաշտոնակատար Դավիթ Տոնոյանը:

«Տեղեկություններն, իհարկե, այդ պաշտոնյաները ստանում են և' մեր զինված ուժերից, և' Ադրբեջանի: Կապը մինչ այժմ գործում է անխափան, Դուշանբեի պայմանավորվածությունները գործում են», - ասաց նա` նշելով, որ նույնը վերաբերում է նաև Պաշտպանության բանակին:

Ինչ վերաբերում է հրամանատարների միջև անմիջական կապին, Տոնոյանը նշեց. «Միջադեպերի կանխարգելման շատ հզոր միջոց է: Մենք Մինսկի խմբի համանախագահների առջև բարձրացնում ենք այդ հարցը, որ նպատակահարմար է ունենալ նաև այդպիսի կապ»:

Անդրադառնալով ռուս սահմանապահների ծառայությանը` Տոնոյանը շեշտեց` ՌԴ զինված ուժերը և սահմանապահները կարեւոր դեր են խաղում Հայաստանի անվտանգության ապահովման գործում: