«Դրանք պնդումներ են մամուլում». սկանդալի մեջ հայտնված դեսպանը հետ չի կանչվի

Գերմանիայում ՀՀ արտակարգ ր լիազոր դեսպան Աշոտ Սմբատյանը հետ չի կանչվի: Այս մասին 2019 թվականի բյուջեի նախագծի քննարկման ժամանակ հայտնեց ԱԳ նախարարի տեղակալի պաշտոնակատար Կարեն Նազարյանը:

Նշենք, որ Գերմանիայում ՀՀ դեսպան Աշոտ Սմբատյանը հայտնվել է սկանդալի կենտրոնում: «Ազատություն»ռադիոկայանը, հղում անելով գերմանական լրատվամիջոցներին, հաղորդում է, որ Գերմանիայում կան հայկական մաֆիոզ խմբեր, որոնց աջակցում է նաեւ դեսպանը:

Նազարյանը նշեց, որ հարցը վերաբերում է շատ նուրբ խնդիրների, մասնավորապես՝ մեր դիվանագիտական ներկայացուցիչների գործունեությանը: «Սպասենք արդյունքներին, և լրացուցիչ տեղեկություններ կտրամադրվեն»,- ասաց նա:

Հարցին՝ դեսպանին հետ կանչելու հարցը քննարկվո՞ւմ է, փոխնախարարը պատասխանեց. «Ո՛չ, դրանք պնդումներ են մամուլում: Չեմ կարծում, որ մենք պետք է հոդվածի առնչությամբ համապատասխան քայլեր ձեռնարկենք»: