Ցեղասպանությունից հետո անտեր մնացած հայկական եկեղեցիներից մեկն ավերակների է վերածվել

Հայոց ցեղասպանությունից հետո անտեր մնացած` Այնթապի հայկական եկեղեցիներից մեկն ավերակների է վերածվել:

Ըստ Demokrathaber-ի` բյուզանդական ժամանակաշրջանից մնացած 7-րդ դարի եկեղեցին` հայտնի Ֆևքանի անունով, դեռևս 2011 թվականին վերանորոգվել է հիմնադրամների տնօրինության աջակցությամբ: Սակայն կարճ ժամանակ անց բախտի քմահաճույքին թողնված եկեղեցին վերածվել է ավերակների:

Կայքի հաղորդմամբ` ամուր հիմք ունեցող եկեղեցին երկար տարիներ կանգուն է մնացել և այդ տարիների ընթացքում դրա այգին ծառայել է որպես խաղադաշտ երեխաների համար:

Եկեղեցին, որի կառուցման ամսաթիվը դեռևս հստակ նշված չէ, ենթադրվում է` ավելի հին է, քան Վանի Աղթամարի Սուրբ Խաչ եկեղեցին:  Ներկայիս դրությամբ վերացել են եկեղեցու պատերին փորագրված սրբերի բոլոր պատկերները: