ԱԺ նիստի աշխատանքներին խոչընդոտելու վերաբերյալ` աղմուկ հանած օրինագիծն ընդունվեց

Քիչ առաջ ԱԺ արտահերթ նիստում ձայների մեծամասնությամբ ընդունվեց  պատգամավորներ Արփինե Հովհաննիսյանի, Վահրամ Բաղդասարյանի և Անդրանիկ Հարությունյանի համահեղինակությամբ մշակված ԱԺ կանոնակարգ օրենքում փոփոխություններ կատարելու մասին օրենքի նախագիծը:

Հիշեցնենք, որ նախագծով առաջարկվում է կարգավորել ԱԺ նիստի աշխատանքներին խոչընդոտելու հարցը, հատկապես` ֆորսմաժորային իրավիճակների, արտակարգ իրավիճակների, նիստի խոչընդոտման հետ կապված: Խոսքը վերաբերում է  2 ասպեկտի՝ երբ նիստը չի կայանում, որովհետև նիստի իրավազորությունը չի ապահովվում, և երկրորդ հատվածը վերաբերում է նրան, որ նիստը իրավազոր է, բայց շարունակում է խոչընդոտվել պատգամավորների մասնակցությունը, կամ նիստում առաջացել են այլ հանգամանքներ, և նիստը վարողի ձեռնարկած միջոցառումները արդյունք չեն տվել: Այս դեպքերի ժամանակ նիստը պետք է ընդհատվի և շարունակվի այն ժամանակ, երբ վերանան այն հանգամանքները, որոնք առիթ են հանդիսացել նիստի վերացման համար: Ժամանակավոր խոչընդոտների համար «ԱԺ կանոնակարգ» օրենքն ուներ կես ժամով նիստի ընդհատման և վերականգնման հնարավորություն:

Նշենք նաև, որ Նիկոլ Փաշինյանի կոչով մարդիկ հավաքվել են ԱԺ-ի մոտ` բողոքի ցույց անցկացնելու օրինագծի քվեարկության դեմ: