Փաշինյանը հետաձգել է իր աշխատանքային այցը ԱՄՆ՝ Երևանի ավագանու ընտրություններում քվեարկելու համար

 ՀՀ վարչապետ Նիկոլ Փաշինյանը մի քանի օրով հետաձգել է իր աշխատանքային այցը ԱՄՆ՝ Երևանի ավագանու արտահերթ ընտրություններում քվեարկելու համար : Այս մասին տեղեկացրեց  վարչապետ Նիկոլ Փաշինյանը` «Ֆեյսբուք»-ի ուղիղ եթերում:

Նա նշեց, որ մեկ ձայնն անգամ կարևոր է, ահա ինչու չի կարող առանց Երևանի ավագանու ընտրություններում քվեարկելու  մեկնել արտերկիր՝ աշխատանքային այցով:

«Ես պետք է մեկնեմ Նյու Յորք՝ մասնակցելու ՄԱԿ-ի Գլխավոր ասամբլեային, և այնպես էր ստացվում, որ ոչ մի կերպ չէր հարմարվում. ինձ անընդհատ ասում էին՝ գրաֆիկը այնպիսին է, որ պետք է սեպտեմբերի 22-ին կամ սեպտեմբերի 21-ին գնալ։ Ես քվեարկելու համար ամեն ինչ հետաձգել եմ և դասավորել եմ այնպես, որ սեպտեմբերի 23-ի առավոտյան քվեարկեմ, ու  դրանից հետո մեկնեմ Նյու Յորք:  Ես նկատի ունեմ՝ այդ մի ձայնի կարևորությունը ընդգծելու համար»,- շեշտեց Փաշինյանը:

Հիշեցնենք, որ ՀՀ ԱԳՆ խոսնակ Տիգրան Բալայանը լրագրողների հետ ճեպազրույցում հայտարարել էր, որ կա մտադրություն` կազմակերպելու ՀՀ վարչապետի հանդիպումը ԱՄՆ նախագահ Դոնալդ Թրամփի հետ: