ԱՄՆ-Հայաստան ևս մեկ համաձայնագրի համար աշխատանքներ են տարվում. Հայ Դատ

Ամերիկայի Հայ Դատի հանձնախումբը տեղեկացնում է, որ առևտրի կրկնակի հարկերի դեմն առնող` ԱՄՆ-Հայաստան նոր համաձայնագրի ուղղությամբ աշխատանքներին զուգահեռ, ներկայումս աշխատանք է տարվում նաև երկու երկրների միջև համաձայնություն ձեռք բերել սոցիալական ապահովության տուրքի կրկնակի գանձումը կանխարգելելու նպատակով:

Ըստ Asbarez-ի` համաձայնագիրը նպաստավոր է լինելու հատկապես ամերիկահայ այն քաղաքացիների համար, ովքեր գործում կամ հանգստանում են երկու երկրներում:

Այս նպատակով ԱՄՆ Հայ Դատի հանձնախմբի ատենապետ Րաֆֆի Համբարյանը նամակ է հղել ԱՄՆ սոցիալական ապահովության վարչության հանձնակատարի պաշտոնակատար Նենսի Պերիհիլին` շեշտելով, որ նման քայլը հստակեցնելու է ամերիկացի և հայ աշխատավորների ծրագրերը, միևնույն ժամանակ նպաստելով երկու երկրների միջև հարաբերությունները սերտացնելու ջանքերին:

ԱՄՆ-ը ներկայումս նման համաձայնագիր է կնքել առավել քան 20 երկրի հետ: